Landdroshofreëls eersdaags in Afrikaans beskikbaar

Die Afrikaanse vertaling van die Landdroshofreëls is uiteindelik voltooi! Dit was ʼn baie groot projek wat teen groot koste aangepak is. Ons innige dank aan die Dr. Marie Luttig Trust wat ʼn ruim skenking vir hierdie projek gemaak het. Ons beplan om ʼn gedrukte weergawe van die reëls aan ons lede beskikbaar te stel teen R150 per eksemplaar. Die gedrukte eksemplare gaan in ʼn A6-formaat uitgegee word en ʼn beperkte hoeveelheid gaan gedruk word. Daaruit sal ons dan ook weer fondse bymekaar kan begin maak om ʼn volgende vertalingsprojek aan te pak. Ons wil die Afrikaanse vertaling egter vir almal toeganklik maak, daarom sal dit ook op die VRA se webtuiste aflaaibaar wees saam met al die vertaalde vorms.

Die Afrikaanse weergawe van die Landdroshofreëls gaan by verskeie geleenthede regoor die land bekendgestel word. By elke geleentheid gaan ons ʼn plaaslike spreker vra om ʼn Prestige-lesing aan te bied. Ons vra VRA-lede nou al om kollegas te identifiseer wat u kan saamnooi na die geleentheid sodat hulle ook deel kan word van die VRA. Dagboek dus dié datums!

 

21 Februarie 2017 – Bekendstelling in Gauteng

11 Mei 2017 – Bekendstelling in Bloemfontein

6 Junie 2017 – Bekendstelling in Potchefstroom/Klerksdorp

7 September 2017 – Bekendstelling in Kaapstad